पारसीकरहस्यवादिनः रूमीकवेः काव्यस्यानुवादः……

 

خداوندگار مولانا

(کجا اید ای شهیدان خدای……)

 

क्व याता हे प्रयाताः सत्यमाप्तुम्

तदर्थं सज्जपादाः कण्टकारण्ये प्रयातुम् ॥

 

क्व याता हेऽतितूर्णस्वात्मवन्तः

चिदाकाशे पतत्रिभ्यः पतद्भ्योऽप्युत्पतन्तः॥

 

स्वहुम्मात्रेण वेनान्निर्दलन्तः

पृथुप्रीतां धरित्रीं , क्व प्रयाता भावयन्तः॥

 

क्व संयातास्तपोविज्ञानवित्ताः

विपत्तावश्मसारीभूतपुष्पाकारचित्ताः॥

 

स्फुरत्तारुण्यतन्त्रास्स्युस्तरुण्यः

यदालोकेऽतिमुग्धे प्रस्नुवद्दुग्धा जनन्यः॥

 

क्व याताः कामनाब्धिं शोषयन्तः

म्रियन्ते जातका वो गोष्पदेहायां ब्रुडन्तः॥